鄭欣宜今日喺銅鑼灣自家嘅曲奇店內，接受譚小環主持嘅奇妙電視節目《搵錢男女》訪問，欣宜話：「我好榮幸，今日有魚蛋皇后嚟到我舖頭，所以我都準備咗鋪頭嘅招牌出品魚蛋曲奇俾小環試吓。」小環就大讚魚蛋曲奇相當特別，咁究竟魚蛋曲奇係咩嚟？欣宜解釋：「我哋會攞條魚起骨起肉嚟整，所以其實我哋嘅魚蛋曲奇係冇魚蛋，只係外形上好似魚蛋，純粹係畀啲新鮮感客人。」

講到嚟緊嘅演唱會，欣宜話已開始準備：「因為隻腳仲未好，所以喺搵舞蹈員時都要花多啲心機，依家總共搵咗六名壯男陪我，萬一到時企唔穩唔夠力都有佢哋扶住。」仲話冇刻意要求位位舞蹈員都要爆肌。

咁欣宜會唔會性感現身？佢話：「演唱會係有一Part會性感，但我自己就未知。」