今日「620」係乜嘢特別日子？以為同無綫高層樂易玲有關？No啦﹗其實今日係靚媽咪李嘉欣﹑準媽咪應采兒（丁丁）以及女歌手鍾舒漫（Sherman）生日呀，咁樂小姐係咪今日生日呢？sorry，唔係呀，佢好似係下個月生日。

好，講返幾位壽星靚女今日點慶生先？去年李嘉欣生日，老公許晉亨除咗同佢開餐外，仲送首飾禮物，以及一個健康檢查畀佢，好窩心啵﹗今年老公又有乜表示呢？嘉欣今日喺微博貼咗張禮物相，相中見到有個皇冠氣球﹑一大紮花及一個可愛公仔照片，但就未見佢同老公及囝囝慶生照，而圈中人包括伍詠薇﹑丁子高﹑舒淇﹑鄭秀文及徐濠縈等，都留言祝嘉欣生日快樂，徐濠縈話：「 Happybirthday生日快樂！美麗的鄰居！ 」

至於快將臨盆嘅丁丁又點呢？老公陳小春就喺微博貼咗張二人合照，小春就祝老婆大人：「生日快樂，大人，年年都（有）今日，歳歲有今朝。」點知丁丁見到就反問老公：「年年都懷孕？」再貼一個抓狂表情圖案，兩公婆隔空打情罵俏，好溫馨。

準媽咪丁丁就喺微博貼咗張相，張相係前年喺北京影嘅，當時丁丁扮大肚婆拎住杯酒，但佢今年生日因為就快生得，所以嘛，只好滴酒不沾咯，佢話：「 生日不喝大，要幹嘛好呢？(照片攝於2011年北京生日PA)。 」靚媽咪，乖乖哋啦!

Sherman今年要好好享受最後一個「2」字頭生日啦，日前泳兒、湯怡、洪杰及洪卓立等，率先同Sherman食咗生日飯，而噚日Sherman接受電台訪問時就話，今日生日可以提早收工，而緋聞男友張致恒就講笑話今晚八點半同佢喺山頂燭光晚餐喎，係咪真嘅先？

生日快樂!