沙中綫醜聞一單接一單，最大鑊嘅莫過於由承建商禮頓負責嘅紅磡站擴建工程，由涉嫌剪鋼筋、擅改圖則、大批工程紀錄亦離奇消失。不過，港鐵似乎對禮頓仍然不離不棄，港鐵今日舉辦嘅「工程處安全研討會暨品質、安全、環保與關顧社區頒獎禮」，禮頓竟然憑紅磡站工程勇奪「安全銀獎」。

有份出席嘅工程人員同八方講，港鐵每年都會搞一次呢類型頒獎禮，旨在表揚鐵路工程嘅承建商。今年就選擇喺九龍灣嘅港鐵總部大樓舉行，有份做港鐵鐵路工程嘅承建商、分判商，總共約200人都有獲邀出席，總共頒發約10個獎項。其中安全金獎就由沙中綫「過海鐵路隧道建造工程」承建商五洋中建聯營獲得，銀獎就由「紅磡站擴建工程及列車停放處建造工程」承建商禮頓獲得。

有工程人員話，當佢聽到連禮頓都有份攞獎，即時打咗個突，仲忍唔住講「搞到咁嘅情況都有獎攞，有冇搞錯！」

翻查網上資料，直至2013年港鐵都會喺頒獎後出新聞稿，公佈得獎名單；禮頓喺嗰年都憑高鐵工程攞到「工程安全獎」同埋「工程品質金獎」。至於得獎公司有咩獎勵、會唔會有獎金、會唔會出新聞稿公佈今次盛事？八方有問到港鐵公關，不過對方就無正面回答喇，淨係話頒獎禮由工程處不同部門代表、根據承建商過去一年嘅表現做評審，鼓勵承建商提升表現；又話舉辦今次活動所有費用係由港鐵同贊助機構負責。

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI