賭王何鴻燊嘅四太梁安琪噚晚喺澳門搞咗慈善拍賣晚宴，四太大仔何猷亨、二房嘅何超鳳同超蕸都有出席，晚宴拍賣8件物品，其中四太以160萬澳門幣，投咗1000克巨型意大利白松露。四太話：「唔經唔覺已經做咗12年，有好多難忘事，幫助咗好多慈善機構，我會繼續做落去，秉承何生取諸社會、用諸社會嘅理念。

孻仔何猷君做首席營銷官(CMO)嘅內地數碼娛樂平台創夢天地(1119)噚日喺港交所上市，四太梁安琪同猷亨都有撐場( 新聞連結： https://bit.ly/2Poi7xl )，四太話：「咁啱又係今日(噚日)，本來我都希望分開搞，夜晚可以一齊食飯，不過冇辦法，慈善活動係更加緊要。」話晒o依家啲仔大女大，唔知四太係咪多咗時間休息？佢就話：「希望喇，我都有番咁上下年紀，小朋友大咗又有自己嘅興趣，希望佢哋做啲自己想做同應該做嘅嘢，有能力要服務番社會！」

日前大女何超盈承認有拖拍，四太又有冇希望快啲做外母？佢笑笑口話：「個個去到我呢個年紀都想，一代傳一代，中國人嘅傳統，但係都要順其自然，唔可以強求。」再問滿唔滿意超盈嘅男友？佢就話：「個個都滿意，我都有催兩個仔，叫佢哋快啲帶女友返嚟見我！」

之後四太同猷亨合照，有記者趁機同猷亨講，話媽咪想佢快啲帶女友畀佢見吓面，點知猷亨笑住揮揮手兼走人，四太即刻話：「佢唔睬我喇，你哋唔好嚇親佢，一陣佢唔帶女友返嚟見我就死喇！」笑問會唔會係猷亨太多女友，唔知帶邊個先啱呀？四太話：「有冇我咁靚先，不過我都係睇報紙先知。」

精選娛聞，喺晒《娛果》
http://fb.com/appledailyent