蘇格蘭前日主場輸畀丹麥○比一,係領隊福士執教半年來六場比賽第五場輸波,如果唔計早排贏港隊四比○,五場對世界盃決賽周球隊都輸晒,認真丟架,亦都證明福士似乎唔多適合教蘇格蘭波喎。
輸波都算嘞,福士賽後重怪責班球員心理質素唔夠,好多嘢要改云云。查實球員唔掂,領隊更加要負責。查實當初我求大俠聽見呢個德國佬教蘇格蘭都打個突,德國戰術性強嘅足球,同粗枝大葉嘅蘇格蘭波格格不入。蘇格蘭如果再輸多幾場,福士自己要醒扒啦。
奧國球證拔錯紅牌收番
可能因為意大利響世界盃發生太多執法爭議事件,連前日對斯洛文尼亞場友賽,奧地利球證布加都成為焦點。或者壓力大關係,佢誤將艾辛莫域罰出場(以為佢兩黃變一紅),後來至發覺原來艾辛莫域之前冇攞黃牌,只好樣衰衰咁叫番佢入場。始終係友賽啫,唔使咁緊張啩。