噚日原來係丁生丁太---楊千嬅同丁子高相識9週年嘅日子，佢兩個加一大班朋友包括小美及排舞師SunnyWong等一齊去到銅鑼灣恩平道附近食飯。

噚晚11點半左右，楊千嬅同丁子高孖一班朋友食咗2個幾鐘之後步出，由於現場有少少雨，兩人都步步急想上車，記者上前問丁生今日咁開心係日子，佢就話:「同老婆相識9周年。」答完就即衝入車，千嬅上車前亦同記者sayhello。而事後丁子高亦放上一張攬實老婆嘅相上社交網站，而睇到佢哋大班朋友合照當中有成4個蛋糕，應該順便慶祝埋其他朋友生日。