購買新樓，特別係大型屋苑做投資，有保值作用，在升市時能賺取可觀利潤，不過樓價會較貴；部份投資者轉為向舊樓打主意，不求升值，但求高租金回報。
美聯物業分行經理鍾漢輝指出，鰂魚涌濱海街八十八號一個低層唐樓單位，便由投資者以六十七萬承接，七百呎，呎價只係九五七元，為市場新低價。幢樓毗鄰華蘭花園同面對和域大廈。
該名投資者一聽見單位放盤，睇都唔睇已經話買，原來佢心目中已諗好晒點搞，計劃間成四間套房出租，每間月租二千五，計落回報有十七厘九，幾年就可以回本。
鍾漢輝話，唐樓放盤少，銀行多數唔做按揭，就算受成數都好低，多數係投資者買。

星濤灣成交減半
政府最近兩次拍賣地皮都以高價成交，市場每次寄望樓市可以向好，點知實情相反，交投未有突破，今個月重差咗㖭。好似馬鞍山嘅嘉華星濤灣，今個月至今僅得四宗買賣，比上個月同期少一半；造價回軟幾個巴仙。
中原地產高級分行經理余志文話，上個月賣地後，業主將叫價調高五至八個巴仙，照現時市況睇，樓價要回落至賣地前水平先有得傾。