27歲的鄧皓荃（Aaron），十多年前開始就有着一個不一樣的奇特嗜好－－「聞香」。他聞的香，有一炷炷用作拜神用的線香，也有用中藥自製的篆香。因為這個冷門嗜好，他身邊的同齡朋友不特別多，反而跟中老年的人更投契。

搶先睇全新GadgetGuy專頁｜fb.com/gadgetguy.appleseed/

從前，Aaron跟平常人一樣，對香的感覺不外乎「攻鼻又揦眼」。中四那年，他跟家人到志蓮淨苑，「我行過某個位，點解咁香嘅呢？我從來未聞過咁香嘅香，明明之前啲香都係臭㗎！」他自此就被香深深吸引，想要找出那炷清香的廬山真面目。他由自己買香開始，每日去離家不遠的西灣河街市香燭店掃貨，還跟婆婆店員成為好友。此外，他還會上網翻查《四庫全書》等經典古籍，找到「香乘」和「陳氏香譜」，開始自己製香。他笑說：「2011年第一次整香，將啲粉左溝右溝，好似做實驗咁，仲搞到成屋都係粉。」因為家中本來就有焚香拜祖先的習慣，家人對家中經常充斥香味並不反感，有時還會參與其中，「我自己整完啲香，都會畀佢哋聞吓，叫佢哋畀啲意見。」

做合規專員的Aaron，除了上班期間不能點香，基本上任何時候都會聞香，「食飽飯、臨瞓前、睇書都會點香。」他下班後會去教人聞香製香，學生多以中老年人為主，他說：「其實放工去教班好攰，不過我當係同人玩咁啫嘛！」記者見他跟學生聊得特別高興，似無年齡隔閡，「我同比我年長嘅人傾偈會興奮啲，因為大家有共同嗜好。」

回想起初接觸香藝，Aaron形容這是個孤獨的興趣，「好似自己匿埋喺房打機咁，不過教香班之後，朋友就自然嚟，可以同人分享到呢個喜悅。」他口中的喜悅，其實是大家找到新的調香配方、發現哪裏有平靚正的香出售等等，「開心好簡單，有時真係聞到某隻香覺得好正，就會好開心，我都唔知點解。」他直言香藝這個興趣已夠冷門，加上他同時熱愛印度文化、穿漢服、玩中樂，中學同學等朋輩知道他這些嗜好，猶如發現新大陸，「佢哋好驚訝，會問我聞香即係點？大家都覺得係古怪又得意嘅嗜好。」

當人人都打機，Aaron卻偏偏走另一條路，「以前中學真係成日唔開心，點解人哋個個都玩嘅嘢，我會冇feel？」他清楚知道「唔打機＝冇朋友」的現實，所以他曾努力「埋堆」，逼自己跟同學打機，「因為我對眼唔係太好，玩唔到槍game、3D遊戲，最多都係玩下《夢幻西餐廳》。我有試過同同學打機，不過我覺得好悶，做晒任務又點啫？一熄機就乜都冇晒。」他停一停再說：「我知道少咗打機呢個話題就少好多朋友。你問我恨唔恨有多啲朋友？其實個心跟唔到就跟唔到。」他還說自己愛調香製香，全因成品可以看得見、摸得到。到入大學主修社會學，身邊同學都因為修同一學科而有相同話題，Aaron就不再為此傷神，「中學係成長階段，會諗自己係個點嘅人，應該點去定位等等。到升上大學，我就已經接受咗自己係咁，冇得改變，我就係咁，呢個就係我。」

Aaron鍾情香文化，希望弘揚香藝。其實香除了祭祀用途，古代亦當作香薰之用，宋朝的文人四事，其中一項就是焚香（其餘三項為點茶、掛畫、插花）。自宋代以來，香港就已經種植土沉香，「香港」此地名的由來，有說亦與此有關。Aaron說：「我覺得香港人連自己住緊嘅地方個名點嚟都唔知道，真係唔係幾好，我一定要令更多人知道香同香港有乜關係。」他直言這絕不容易，因為「攻鼻揦眼」的刻板印象已經深入人心，「香霸佔我生活嘅所有，我覺得（時間、生活、朋友上的）犧牲係好值得，因為有種使命感。文化係可以隨時消失，如果我唔把握時間去做，香文化可能好快就沒落。」

佛語有云：「一炷清香自得聞」，聞香之樂，或許只能靠自身體悟。

facebook：香港傳統香文化保育

記者：李煒汯
攝影：盧君朗、黃智琳