正當免費電視市場風起雲湧，「阿兜」由「愛國旗」轉手畀「老茶」可能引起大規模兵變潮，收費電視呢邊廂亦不愁寂寞，事關K寶嘅收費電視一哥寶座似乎終於保唔住，俾二少個4歲baby──now坐咗！
8號仔噚日趁住天朗氣清公布呢個好消息──now登記客戶人數經已進入另一個recordhigh，過咗80萬，比上個月派成績表嗰陣嘅75萬又跨進一大步！

佢哋只係揀咗喺自己地頭太古坊某餐廳搞個小型記招，係咁意開支香檳影張相就算，但低調得嚟又播番首《WearetheChampion》應吓景，如果K寶話事人海哥咁啱喺嗰度食lunch聽到「WearetheChampion」，相信會背脊骨落！
英超聯仲未開波就做到呢個成績，8號仔電視業務董事總經理梁德昇心情有幾靚？淨係聽佢連自己透過8號仔儲蓄互助基金儲私己錢，兼年尾有孖臘腸收都爆埋出嚟就知！
昇爺話，交到呢個成績都唔敢自滿，仲指新增每5個客中，有過一半係join$178睇波嘅超強體育組合套餐，所以希望喺8月英超開波前可以上多10萬客……
查實唔難嘅，事關市場上面英超球迷個pool係介乎15萬至25萬，咁now有獨家播映權，要睇波一定要幫襯二少，昇爺都唔使太過謙虛，之不過華華都明白，你做到80萬老細就會好理所當然叫你交100萬，仲要肯定你搶到對家個marketleaderposition…所以，昇爺，「奸爸嗲」！！！
[email protected]