噚日報道過，37歲前巴塞隆拿中場沙維喺卡塔爾酋長盃決賽交出美妙助攻，為效力球會艾薩德勇奪隊史第67個錦標，連同上月稱霸卡塔爾盃成為盃賽「雙冠王」，照計以佢嘅「卡士」，係咪攞硬卡塔爾最佳球員先？

不過，喺周六舉行嘅卡塔爾足總年度頒獎禮，沙維雖然獲提名「年度最佳球員」最後三強，但最終連同艾薩德隊友、卡塔爾國家隊隊長艾哈度斯齊齊落選，得主就係攻入14球、協助歷基韋亞稱霸聯賽嘅25歲南韓前鋒南泰熙啦，都係實至名歸架。