當年今日
關於我們

【八方相當年】飛機師徒弟明明係讀Law 寧親老鼠屍放棄做大狀

蘋果日報 2019/03/05 07:03

公民黨梁家傑麗港城拔萃男書院譚文豪八方相當年李煒林

明明係讀Law,點解唔做人人覺得尊貴嘅大狀,反而落手落腳做地區工作,仲要近距離檢視老鼠屍?27歲嘅李煒林(William)話源於心中嗰團火,「覺得從政好有意義」,結果英國學成歸來無加入法律界,反而喺九龍東跟住飛機師譚文豪落區。呢位中小學都讀男拔萃嘅公民黨新星,自稱係香港教育制度嘅失敗產物,「我係鍾意啟發性同討論性多啲嘅學習」,唔知做區方面,有冇創意之舉?
William嘅法律之途,真係好早起步,小學已經參加過「香港法律及經濟學會」舉辦嘅小律師班,佢話爹哋成日鼓勵佢同細妹多睇書、又着重訓練邏輯思維,相信因此令佢有志投身法律界,就連細妹都讀緊PCLL。佢話做拔萃仔時讀書唔算叻,仲不時因為「奀皮」俾老師罰,試過上堂老師叫佢唔好扤凳,兩次警告後繼續隨心所欲,「結果咪被罰用毛筆抄寫『我以後唔再扤凳』,抄足兩本簿,之後梗係唔敢」。
08年中五畢業後到英國讀預科,再到Coventry University讀法律,身高178cm嘅佢見到欖球隊員有啲氣勢,自動獻身入校隊,隊中得佢一個黃皮膚,但無礙同隊友合拍,最記得第一次操練後,「隻手震到扭唔開水龍頭,因為真係intensive training」,佢話欖球教識佢好多嘢,包括合作性同紀律性。
William喺英國曾經跟過英國御用大律師實習,2016年返港後則跟過法官學嘢,如果入行,佢話一定會揀做大狀,但當年返港後卻有種好強烈感覺:「覺得香港孕育咗我」,機緣巧合下識咗公民黨梁家傑,咁啱當年有立法會選舉,一直覺得法律同生活密不可分嘅佢,開始跟住傑哥同傑哥接班人譚文豪學嘢,學學吓不能自拔,而家全情投入麗港城社區服務,由清理塌樹到檢視路邊老鼠屍,佢都落手落腳。由法入政,係愛都係種責任喎!

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money!
http://bit.ly/2ICO2Mb
empty
師傅譚文豪(左一)經常帶住徒弟李煒林(左二)同官員見面。右一、二為食衞局副局長徐德義及局長陳肇始。李煒林提供相片
empty
自細已經染指法律界,曾經參加「香港法律及經濟學會」嘅小律師班。李煒林提供相片
empty
身型高大有成178cm嘅李煒林,喺英國讀書時加入欖球隊。李煒林提供相片
empty
俾外婆錫到燶嘅李煒林,多謝外婆教識佢待人接物。李煒林提供相片
empty
新年開檔幫街坊寫揮春,是常識吧?李煒林提供相片
empty
幾歲大嘅李煒林,眼仔碌碌。李煒林提供相片