成龍今午1點出席影視娛樂博覽，以會長身份宣佈香港演藝人內地發展協進會創立，司儀劉璇同林曉峰先上台，劉璇稱今日嚟嘅人，坐前排都係非常有成就，跟手播出影片，搵咗莫華倫、麥兆輝等拍片講出香港幕後工作者付出嘅努力，希望中港可以互相交流唔同嘅思維。

而王祖藍喺片中講廣東電視台有時都想拍番多啲粵語節目，祖藍指廣東仍然有呢個需求，副會長阿倫喺片中指有啲工作人員開工收唔到錢，或者被人恰，係伸冤無路數，副會長汪明荃又指曾經多次上去同有關部門反映，首先要解決待遇問題，目前係少咗兩地互相溝通嘅渠道，希望技術互通就係雙贏；為咗搞氣氛，現場播出阿倫講唔晒「香港演藝人內地發展協進會」呢個名嘅NG片，群星於影片講出支持說話。

成龍上台照稿講：「大家知道喺過去十年，內地無論係電影、電視市場越做越大，代表機會越嚟越多，內協會係希望加強兩地合作，幫助香港所有台前幕後嘅演藝人員去內地發展，喺舊年，我用咗20年時間成立咗中國特技人協會，20年我不斷喺度嘗試，希望一啲流離浪蕩嘅特技人有一個家，亦都可以俾外地導演同製片去到中國有一個渠道去搵到最好嘅武術指導、最好嘅特技人。」

成龍又指廿年前成立演藝人協會時，係幫助後輩謀福利，佢再望一望稿講：「呢一次內協會都係香港有心人士自發性發起，我哋可以成立獎學金，同埋俾香港可以喺內地，同各大演藝學系嘅學府學習，機會係永遠俾有準備嘅人。」成龍多謝今日出席嘅影壇大佬、好友、兄弟姊妹。

阿姐與志偉亦於台上分享，阿姐指兩年前與到內地不同部門作拜訪，2016年已經首接觸內地官員，表達業界嘅問題，習近平亦於十九大時曾說，要做多啲港澳嘅發展，可見佢都好重視呢一方面，所以佢哋就籌組呢個會；志偉則指內地一年有一萬六千部電視劇，八百部電影進行拍攝，發展機會非常大，成立內協會，會喺北京、橫店設立分處，希望香港嘅演藝人到內地發展時，亦有一個協助同溝通嘅渠道。志偉再講到大灣區亦發展，會有好多機遇，俾到佢哋多一個粵語嘅市場，希望同內地多啲溝通，廢除拍攝電影上嘅香港人限額。

阿姐強調內協會有一個宗旨：「團結、幫助、跟進」，佢話呢個宗旨係演藝人協會主席古天樂諗出嚟，大讚古仔呢個宗旨非常好。