科隆開季至今仍然未嘗一勝，成績一敗塗地，喺德甲五連敗後，上周先終於喺漢諾威身上搶得一分，被視為降班膽，而周中歐霸盃分組賽不敵貝爾格萊德紅星後，亦喺該盃經歷二連敗。

外界都認為上季射手莫迪斯迪轉投中超嘅天津權健，係科隆不振嘅最大原因，尤其佢哋去到目前為止，歐洲賽加德甲八戰入得兩球，攻力疲弱冇得呃，所以今周佢哋就邀請到曾效力過雲達不來梅、車路士同拜仁慕尼黑嘅秘魯中鋒比沙路加盟，同佢簽約到季尾，希望可以改善進攻。

教練史度加就話：「比沙路係一個對症下藥嘅射手，而且又有個性，踢過好多勁隊，我覺得佢可以幫到球隊。」比沙路喺德甲共錄得430次上陣，射入191球，有73次助攻，後生時算係一位高效中鋒。

比沙路上季約滿不來梅後，一直冇球會落班，如果佢表現對辦，今季由緬恩斯過檔後被批評係水貨嘅祖安哥度巴，一定冇碇企。