圈中型佬如果識煮兩味拿手小菜，絕對加晒分，好似吳鎮宇、黃秋生、「Chef Lemon」謝霆鋒等都係煮美食一流，其實黃宗澤(Bosco)都好煮得，不時下廚宴請朋友，皆因佢後生嗰陣，曾喺契媽開嘅大牌檔跟師傅學廚，之前整過花雕冰鎮醉蝦、香葉辣炒花蛤同生炒胡椒蟹等，真係要寫個服字。

Bosco現時成日喺租住酒店嘅廚房，變成「屋企廚房」，化身大廚，煲湯同煮小菜，佢今日喺微博貼出美食相，相中見佢又係噴泉辮子look入廚，留言：「好朋友生日，小辮子廚師當然要出馬，而且還要表現出專業的水準！」原來為朋友露兩手，煮咗櫻花木煙熏甜蝦、香草白酒煮大蜆、黑椒牛油波士頓龍蝦、紅酒蕃茄炖牛腿及蒜蓉辣椒炒意粉。