天時暑熱，梗係盡量留喺有冷氣嘅地方，行完街直接搭車走，咁就最perfect喇！嗱！呢隻高大威猛嘅雪橇大哥就識嘆喇，行完街仲入埋閘想搭港鐵返屋企！

文先生喺6月26日(周二)黃昏6點去到港鐵南昌站，準備入閘搭港鐵，入到站內無耐，就發現隻雪橇，由文先生提供嘅片段見到，隻雪橇喺度慢慢行，滋油淡定，好似非常了解站內情況，「好似熟客咁，完全唔緊張架！」，佢喺雪橇後面行咗一段路，都唔見狗主出現，但隻狗嘅表現，似出巡多過走失喎，文先生話，隻雪橇最終竟然行咗埋閘機，仲穿過闊閘機，喂！你未拍卡入閘會畀港鐵罰5000蚊架！

就咁睇，隻黑白色嘅雪橇，毛色都幾靚，而且仲肥嘟嘟咁，一啲都唔似係流浪狗。而佢咁威猛巡視車站，其實已經引起咗港鐵職員嘅注意，「幾個職員圍住佢，叫乘客唔好行埋黎，跟住引導佢行返出去。」葉先生形容，雪橇十分聽話，隨即離開付費區，「圍觀嘅人都讚佢好乖喎！」文先話見到，雪橇頸上面掛住噹噹，估計佢應該有人養，只係同主人走散咗。由於文先生趕住搭車走，所以都唔知隻雪橇最終有冇人接走，但佢都希望雪橇可以快啲同主人團聚。

港鐵發言人回應話，當日6點左右，港鐵車站職員發現，有狗隻於站內徘徊，更經閘機進入付費區，職員根據指引，帶同工具到場處理，將狗隻引離付費區，之後再將牠引領到安全區域，狗隻最終由A出口離開車站，其間車站運作並沒有受影響。

你敢爆，我敢獎！ 即Call《蘋果》24小時爆相爆片熱線 ：63836568