20年前的陳浩晞還不叫陳浩晞，她叫陳佩詩。人生上半場，她是為夢工場奮不顧身的電影人、是受老師感召到法國半工讀的浪漫少女、是攝影大師何藩的入室徒弟，也是首部千萬票房經典艷情片《我為卿狂》的執行導演：人生下半場，離婚生女做單親媽媽，改名轉行做空姐由零開始，捱至女兒大學畢業，才再掌鏡赴蒙古為奧比斯拍攝紀錄片，甚至自資創辦雜誌，推動本地文化藝術。「我嘅人生係倒轉嚟行」。人生如戲，未到最後未知結局。「好多選擇唔知對定錯，但我選擇唔後悔」。女人四十，尋回錯失了的人生，她是陳浩晞。
記者：呂麗嬋

明日晚上在藝穗會，有一個名為「聽‧見」的慈善音樂紀錄片分享會，為非牟利人道機構奧比斯籌款，有弦樂四重奏及人聲演出，為紀錄片現場配樂，還有本地原創音樂單位演出，搞搞新意思。炮製這個創意演出的，正是陳浩晞。「喺香港，要推動本地原創係好難，一個普通嘅音樂會，吸引唔到年輕人入場」。拉攏有心人義務演出，沒錢收還得打友情牌，她卻說有一種久違了的滿足感。「唔好話拍片，近幾年先買番部相機，我嘅年代，係玩FM2（機械相機）唔係數碼機。」她說。
自言「脫節」，但曾幾何時，她是在片場指揮若定的女中豪傑，見證90年代港產片百花齊放，也為那些年BT盜版橫行吃盡苦頭。「𠵱家好多人覺得，聽歌睇電影上網（免費）下載就得，但嗰時對個行業嘅影響真係好大，打爛好多人嘅飯碗，電影一上畫，喺網就有得睇，好多電影人被迫轉行，做開燈光師嘅轉行去揸巴士。被選擇離開嘅一群，好多唔係因為能力問題，係因為有家庭負擔」。那是還沒開始北上搵真銀的年代，通向夢工場的路，不易行。
師承何藩，合作拍90年代一系列經典三級片包括《夜激情》、《三度誘惑》、《四度誘惑》，以至在《我為卿狂》中擔任執行導演，她直言風月電影，未必是她心中最愛的題材，但那些年，每個機會都得來不易，特別珍惜。「我入行，先知師傅係好出名嘅攝影師，佢嘅相好注重燈光，喺片場拍電影都一樣，你會睇到，就算係呢類片，效果係與別不同」。何藩生前受訪提及自己的電影夢，曾說「要為三斗米折腰」，但仍堅持做好每一件工作，陳浩晞對此感受尤深。

「我係單親媽媽，
個女開始大……冇工開係大問題」

在傳統名校拔萃女書院畢業，初中已是電影迷，小妮子自小已立志做導演。「我間學校幾保守，但嗰時唔知點解，請咗個教經濟嘅老師就好free style，我哋叫佢Mr. Mok（莫昭如），佢上堂會講好多電影同藝術嘅嘢，我記得有次請咗個法國人嚟分享，嗰時個人諗嘢係好簡單，覺得電影呢樣嘢，唔知點解本身就好法國」。她大笑。系出名校，會考成績不俗，幾近篤定在港升讀大學，只是那些年仍叫陳佩詩的小妮子，衝動又浪漫，不理老師父母反對，寧願捱麵包半工讀，考進巴黎電影學校L'ecole de Cinema a Paris，向夢想進發。
「嗰時嘅法國係好自由，讀書可以搵工做，唔使屋企畀錢，佢哋都冇我辦法」。90年代香港電影百花齊放，學院派出身的她不介意由場記做起，只是，再有理再不計較都好，現實還是很殘酷。「做呢行好講埋到乜嘢班，可以一年拍8部戲，亦可以一年都傾唔成一套」。她是學院派也是紅褲子，由斟茶遞水的場記做到副導演，又由副導演做到掌鏡的執行導演，「嗰時啱啱行電影三級制，我好歹都做過千萬票房電影導演。」她自嘲似的大笑。
由工作到家庭，陳浩晞自言跌跌撞撞，「人生總缺乏點運氣」。「我係一個幾衝動嘅人，有時都會諗，如果細個唔係咁心急，乖乖留喺香港讀大學，喺浸會讀傳理系，行嘅路會唔會唔同？」可惜人生就是沒有如果，那些年的她很任性，20歲就經歷結婚離婚生女，像電影快鏡般，預早跑完人生上半場。「我係單親媽媽，個女開始大，要讀書，花費好多，一年傾一部片，冇工開係大問題」。就如《一代宗師》的經典對白：最難越過的是生活。換回現實的人生，何嘗不是？

「人生好多選擇唔知對錯，
但我寧願選擇唔後悔」

為女兒，她決心走進人生下半場。拍完葉芳華的《孽戀》，當時仍是陳佩詩的她，選擇離開最愛的電影圈，以26歲「高齡」考進航空公司做空姐，受訓完第一日正式上班，穿上靚靚空姐制服，她直言百感交集，感觸落淚。「由細到大都係男仔頭，冇諗過有朝一日，要着高踭鞋化妝返工，見到其他同事咁開心，我就諗：今日係你哋夢想嘅開始，卻係我夢想嘅終結」。只是決定了就不回頭，收拾心情迎接新生活，陳浩晞說竟發掘到周遊列國的樂趣，越做越好。走出去，原來沒想像中難過。
「同我一齊受訓嘅大都只有18、9歲，我26歲叫做好遲起步，不過都有好處，就係比較成熟，佢哋話有啲客好難招呼，講真我喺片場，有乜嘢未見過，俾人投訴吓亦唔覺得有咩大不了」。由航空公司到被挖角在私人飛機任職，跌跌撞撞的人生，到女人四十，總算望見家鄉。「前幾年個女大學畢業，經濟環境叫做比較充裕，我即時買咗部相機獎勵自己」。重拾放下十幾年的鏡頭，又自資創立免費文化藝術雙月刊《freshman》，為本地原創的新鮮人創造平台。
「我嘅人生係倒轉嚟行，有啲嘢係追唔番，不過𠵱家俾人叫紀錄片導演，仍然幾開心」。人生如戲，未到最後未知結局。「人生好多選擇唔知對錯，但我寧願選擇唔後悔」。由《我為卿狂》到赴蒙古為奧比斯拍攝紀錄片，這個非常空姐，仍然烈如火，想做就去做。「連你都問我啦，出本雜誌免費派仲印實體，成本係咪好高？可能我係老式人，覺得紙本感覺係唔同啲，仲係捱緊……不過我都學緊打理個facebook專頁，幾條線並行啦」。關關難過關關過，世界變了，這個昔日橫衝直撞的楊眉女子，其實冇變。