經濟唔好，連中環都出現籠屋？社區組織協會喺呢個星期三，會將大角嘴一間籠屋成間搬去中環Schoeni畫廊展出，畀中環啲精英、貴族見識吓，仲恭候煲呔、鬍鬚曾等達官貴人隨時嚟參觀。社協嘅施麗珊話，金融海嘯之後，籠屋租金反而企硬，因為需求大咗，月租仲要成1,200蚊。

恭候煲呔方便到訪

呢個展覽，係今年ArtWalk展覽系列之一，展出嘅籠屋可以畀人摸、瞓同坐，同場仲有一批攝影作品，題材都係同香港嘅弱勢社群有關，好似籠屋、板間房、露宿者、童工、難民、老人、精神病患者等。
施麗珊話，香港有近十萬貧民住喺籠屋、板間房等居住環境，金融海嘯下佢哋失業或者減人工，連紙皮、汽水罐都大跌價甚至冇人收，但另一方面食物價格仍然高企，租金呎價有加冇減，部份更可媲美豪宅，居民惟有勒緊肚皮。
佢希望，藉今次展覽引起社會同政府關注基層房屋同貧窮問題，尤其係煲呔同鬍鬚曾多次以事忙，拒絕落區探訪籠屋嘅邀請，施政報告同財政預算案政策又冇乜措施惠及籠屋、板間房嘅居民，社協惟有將籠屋搬去中環，方便佢哋到訪囉。