已成過街老鼠嘅何君堯 ，佢匹愛駒「天祿」本來今晚出賽，仲安排跑第一場，不過唯恐引來示威者狙擊，到時差佬係跑馬地施放催淚彈，射親人事小，最怕係身價逾千萬嘅尊貴「馬仔」吸咗催淚煙頭暈身㷫，保險公司咪賠到扒街？冇辦法啦，家陣嘅香港，人不如畜牲呀。貴為律師嘅馬會主席周永健，又點會唔識計數呢？最終取消今晚賽事。累馬會投注額又少咗起碼十億八億。

咁周永健就有藉口向林鄭說:「不」。話說去年底，公益金五十週年籌款晚宴上，周永健以馬會主席身份上台獻唱籌款，但馬會作為香港最大嘅慈善團體，「跌」少少去公益金又容乜易，何解要搞到主席上台「賣唱」呢？所以周永健當晚上台都俾咗句說話林鄭聽，謂:「我哋馬會搵埋、搵埋俾林鄭呀！」搞到林鄭在台下耍手擰頭。林鄭上任後急於向中共獻媚，遂繞過立法會撥款，直接向馬會 「揼心口 」＄35億，以完西九故宮博物館之夢;而中區警署活化成「大館」，同樣由馬會「 泵水」，亦都係林鄭主理發展局時嘅 「大作」，林鄭主政下，每每向馬會伸手，又難怪馬會主席「有話兒」。

撰文：宗菁華

9月2日起升級條件將更新 繼續每月撐壹仔 講真心話撐住我香港！