J.Arie同許廷鏗同樣係香港大學畢業生，今晚二人聯同石修到港大參加長者晚宴，會同長者分享校園往事同講下人生經驗，希望勾起長者美好回憶。

J.Arie重返港大，即想起求學時期喺禮堂嘅趣事，仲話：「以前好鍾意喺呢個hall唱歌，古典味好濃，電影《色戒》都曾經喺度取景。」夠膽接拍呢類戲?J.Arie笑言：「唔知喎，拍戲方面要搵個定位，林家棟話我，女神同性感都唔到我，我諗我屬於真性情多啲，唔使包裝。」J.Arie坦言覺得女神同性感feel都好蝕底。而讀法律畢業嘅佢，希望可以有相關角色可演。

石修近日簽咗英皇電影，短短簽五個月已拍咗三套電影，修哥話：「可能我呢種角色巿場上少啲，之後又會同有線合作。」再印證離開大台都好多出路。大台逃亡潮持續，要搵走咗嘅藝人回巢救亡，修哥有冇份呢？修哥冇正面回答，只笑笑口話：「好多朋友喺裡面，大家都認識。」