莊思敏（Jacquelin）同妹妹莊思明今日去到灣仔舉行嘅鐘表展活動，Jacquelin帶病出席，早幾日發燒感冒要睇醫生，佢話：「因為6號要飛去台灣做選美評審，所以唔可以病，平日病咗食完成藥就冇事，但今次嚴重咗。」但係Jacquelin就呻阿妹思明唔關心，只係喺ig問候一句就算，思明仲笑家姐係「精神病」。

Jacquelin自爆原來自己貪玩，上星期落雨都照出海玩，又水著又落水，所以搞到病咗，問佢有冇人照顧？Jacquelin話：「我都想快啲有人照顧吓。」佢仲笑言見到思明同男友楊明好似連體嬰咁，搞到佢冇眼睇，Jacquelin話：「成日喺我面前熠熠樣樣，我冇眼睇，每次都返入房。」問到思明係咪已經同居？佢就話依家唔算，大家得閒就互相上對方屋企瞓吓，佢仲笑言唔夠錢築愛巢，大家提議佢租家姐間屋，思明話：「佢嗰度只啱一個人住喎，唔夠住，唔通要租多個單位擺嘢咩？」

精選娛聞，喺晒《娛果》
http://fb.com/appledailyent