由馮國經領導嘅大珠三角商務委員會趁發表年報，噚日在麗嘉酒店請各大傳媒食晏，介紹一吓佢哋嘅工作。除咗馮國經、鄭維健、梁君彥、葉成慶、董立新等人，幫委員會做秘書嘅政制事務局副秘書長何健華都有到場。
原來自從粵港聯絡專員蔡潔如升官之後，呢個委員會就撥歸政制事務局「照顧」。主人家陣容鼎盛，各大媒介都好畀面，有逾20人出席，不過大家對呢個課題似乎唔係好有興趣，雖然馮國經任問唔嬲，但發問嘅人就好少。
回歸之後，香港同珠三角經濟關係日比日密切。正如鄭維健講，7年前講「融合」好唔啱聽，但現在人人都講。咁又係，日日咁多人北上南下搵食，單係珠三角，港商嘅工廠已經有9萬間，你話佢哋造成污染又好，話帶挈我哋發財亦得，總之兩地嘅交往咁多，好多具體事務必須坐低傾，唔掂傾到掂。好似條港珠澳橋，8年前馮國經都話要起，因為「做人世界」，現在都未拍板，你話幾影響經濟交通嘅發展。
梁君彥最關心交通，佢話人家搭飛機去上海機場，一個鐘之後可以在昆山傾生意；但搭飛機嚟赤鱲角，三個鐘都未去到東莞！咁香港仲好意思話係中國gateway？Gate就差唔多。

梁君彥快人快語

梁議員果然快人快語，但兩地海關邊檢唔止涉及地方行政，仲關中央事，真係好難搞。人家美國出境去加拿大可以睇都唔睇，但一國之下，中港日日貨櫃車排長龍，人流物流大擠塞又真係幾耗費社會資源。
大珠三角委員會下面有六個工作小組，各有範疇。當中鄭維健就接替羅仲炳搞科教人才資源，佢話自己到任個零月，仲熟習緊；佢退晒休，除咗呢個會只係幫大學做吓嘢。董公子由於係董建成嘅事務主任，噚日到場介紹其中一個研究課題，講珠西發展。
至於葉成慶，佢係服務業發展工作小組召集人，上手係梁振英。咁個會未來有乜搞作？就係10月底11月初，搞一個大型研討會，一有詳情，就會公布。
李華華
[email protected]