魔術嘅麥基迪真係可憐又可笑，賽前猛話自己幾醒幾威，一定要迫到黃蜂要打第五場生死戰咁話，點知係噚日場波，呢位後生仔背患復發，死撐住嚟打，佢身為魔術「食胡」人物，對手重唔趁佢病攞佢命咩，於是乎咪頻頻向佢動粗囉，黃蜂球員麥高洛更用手撞落麥基迪嘅後腦，好在俾球證睇到罰佢離場。
麥基迪見佢班隊友唔生性，自己咪搏晒命搶分囉，最後都攞咗三十五分，但鬼咩，魔術最終咪輸波出局；最抵死係賽前俾麥基迪話唔夠自己咁醒嘅白朗戴維斯居然又再攞三雙成績，你話麥基迪當時個心係咪揦住揦住咁啦。
唯一安慰係麥基迪係星期二同體育品牌adidas簽咗終身合約，以後每賣出有“T-Mac”代表佢嘅球鞋同用品，麥基迪就可獲得版稅，今次重唔發達，所以我求大俠幾時都話，一個人時運有高有低，係會輪流轉嘅！

施夫高域險做千古罪人
如果利華古遜入唔到歐冠盃決賽，睇怕佢哋嘅後衞施夫高域會俾班球迷恨足一世。事關佢除咗喺上周三嘅首回合擺烏龍之外，喺周二晚次回合又無端喺禁區跣腳，搞到利華古遜先失一球畀曼聯。好彩佢隊波最後都追得番，否則佢就做硬咗千古罪人嘞。