阿董上個禮拜喺立法會話會叫班問責高官「多啲落區」，財爺唐唐噚日即刻飛身響應，佢咁勤力唔單止得到老董賞識，現場重有路過嘅平民百姓話佢可以做特首，搞到唐唐臉紅紅好似初戀少男咁嘅表情。含住銀匙出世嘅唐唐，除咗精通法國紅酒，品味始終高人一等，佢噚日揀咗出席第二十五屆老爺車展，呢啲高尚知識自然唔係住屯門將軍澳嘅市民所擁有。
好似美國佬咁向來重視Family嘅唐唐，帶住夫人郭妤淺同三個仔女一齊出席，唐太話禮拜日一家人通常食吓飯，傾吓偈，增進感情。由於唐唐唔想小朋友曝光，參觀靚車時自己一個行先，太太同仔女就遠遠墮後，唔想俾傳媒影到佢張全家福，到最後現場嘅新聞官重搞到要出手攔路。梗係喇，試過好似毓民咁，啲官唔驚咩。
當唐唐睇完靚車，正想鬆人之際，佢身邊突然殺出位路人甲，大讚唐唐可以做下屆特首，又話電視台噚日播咗唐老太嘅歌唱表演，大讚唐老太好好歌喉。當司局級問責高官都俾電台女主持人問有冇收受地產商賄賂嘅今日，有唐唐咁嘅乖仔官，又爭番唔少分嘅。
（圖）財爺唐唐（右）落區睇老爺車，呢位阿叔（左）一時大讚唐老太歌喉了得，一時又話唐唐可以做特首，搞到唐唐面珠一紅，好鬼尷尬。
李家皓攝


傳真︰2623-9278
電郵︰[email protected]