【我的美麗孕記】前港姐麥雅緻和張頴康於12年結婚，3年前誕下囡囡，日前再為老公誕下一子，湊成好字。她產前接受《蘋果》專訪，分享陀B兼育兒心得。她說：「喺群組有好多媽咪都問，點解會有勇氣生第二個，𠵱家回望番，係一個階段，好快就過，有咗第一次嘅經驗，心理上有啲調節，知道係乜嘢一回事，所以變咗係期待，食得瞓得，似家姐就好！」
麥雅緻今次陀B比上次陀小豆時發福唔少，她說：「聽人哋話第二胎好易見肚，我陀5個月好似7個月，可能身體有記憶，有番嗰個位畀BB長大！」她又透露，本來想跟餐單食，希望肥胎唔肥人，但較相信營養均衡。

囡囡樂做家姐

麥雅緻覺得餵夜奶最辛苦：「最初兩個鐘一次，慢慢變4個鐘，今次我都會繼續餵，辛苦都要堅持。餵人奶喺情緒方面要自己調節到，如果人人逼你餵，但好唔想做就唔好，因為影響到情緒。」
如何令囡囡接受細佬？麥雅緻說：「好早畀囡囡知道會多一個成員，最初佢唔知發生乜嘢事，有啲妒忌，成日問幾時嚟，慢慢睇到轉變，好proud of自己係大姐姐，始終佢仲係好細，預咗有情緒。」麥雅緻指她和老公教小朋友有一個方針，她主力教育方面，他負責陪玩。
採訪：何慧斯　
攝影：沈健程