內房龍頭萬科董事長王石搞婚外情，戀上細30年嘅內地女優，不單止冇俾人鬧佢負心，內地網民仲借呢個話題做咗個調查，發現最多人想嫁嘅係王石、騰訊（700）主席馬化騰同埋阿里巴巴董事長馬雲，可惜三位都係已婚人士，大家想吓好喇。
已屆花甲之年嘅王石最多網民like，鍾意佢穩重、敦厚、值得依靠；同佢一齊喺深圳做房地產嘅行家就認為，王石識經營、登峯、寫書，呢啲形象最容易令女性產生好感。
比王石後生廿年嘅馬化騰就排第二，原因好簡單，咪就係貪佢後生、靚仔、負面新聞少囉。可惜，要扮偶遇認識馬化騰唔容易，佢唔爬山、唔讀商學院、唔出書演講，都唔知去邊度撞佢好。

馬雲唔靠靚仔靠把口

聽講佢唯一愛好係天文，仲係瘋狂嗰種，想同佢有偈傾，要去咪書惡補，或者去多啲太空館吸收天文知識先至得。
比較估佢唔到嘅，應該係金句多到拍得住黎明嘅馬雲，投票網民當中，有五成like佢，話鍾意佢嘅語錄金句同演講，認為佢可以做到人生路上嘅導師喎。馬雲除咗鍾意講嘢，原來仲鍾意耍太極，想識佢不妨同佢切磋兩招。
講到尾，市儈啲講，三位最大嘅共通點咪就係富貴囉，王石唔使講啦，而喺「2012福布斯中國富豪榜」當中，馬化騰同馬雲分別排第4同第11位，大家覺得呢個吸引力係咪最大呢？

李華華
mailto:[email protected]