噚日市況牛皮,最後收市升105點,嘉賓黃敏碩認為雖然近日有不同股份接力上升托起恒指,但始終大市上升動力未夠,恒指能否突破10天線與20天線局面,就要進一步引證。
黃:黃敏碩 楊:楊慧玲
楊:市況好似好悶,不過悶市之下有個別股份表現非常好,煤炭股方面有神華(1088)同中煤能源(1898)都升得唔錯,不過佢哋嘅A股都係跌,港股都好似唔係好跟內地股市走,究竟股民可以點做?
黃:煤炭股嘅AH股走勢方向不一,神華雖然有利好消息,但對A股刺激唔大,反而神華H股有炒落後情況,引至AH股發展不一,其實最重要都係政策因素先可以推動佢哋股價全面上升。
楊:市場好似係炒追落後,𠵱家仲有乜板塊值得追?
黃:航運股板塊表現都係繼續向上,接力股份有中海集運(2866)同中外運航運(368),最大推動力係波羅的海指數上升,而之前佢哋股價比較落後,有投資者藉此推高股價。不過內地出口放緩,油價亦繼續上升,所以航運股未來都仲會有挑戰,故此揀股都係要小心啲。