當年今日
關於我們

【投行秘聞】港幣還是美金?That is the question(遮打道口水佬)

蘋果日報 2020/06/09 18:00

遮打道口水佬

自從《國安法》消息一出,香港全城鬧得熱烘烘,傳聞不少港人爭相棄港元兑美金的消息不絕於耳。有朋友對我說,以一個金融人角度,怎麼不分享下我的看法。我話香港市場消息迅速,只有什麼風吹草動,一系列的「應變措施」諸如用什麽不同銀行開美元離岸戶口之類,已經很快在大少傳媒報道過,唔需要我加多把咀。我反而想在實際角度方面分享一點看法。

港幣是否一種穩陣貨幣?是!驚唔驚港幣眨值?驚!好似好矛盾咁,但事實上就係咁矛盾。如果市場已有十足十答案,重點會有人輸錢?所以咪要有risk management囉。作為一個以structure新興市場貨幣為產品出身嘅人,由泰幣、印尼盾、韓國環、菲律賓披索、墨西哥披索、內瑞拉bolivar、南菲Rand、蘇聯盧布以至波蘭Zloty等等,早在多年前都已經炒過晒,贏過亦輸過。這些貨幣和國家當年都有些共通點:美元外債高企、政府外滙儲備越來越少和信心危機。港幣本來無可能同這些貨幣作比較。因為香港沒有太大的外債,暫時不是問題。外滙儲備也龐大,雖然勢頭是日漸向下,問題慢慢會浮現,但暫時還不是問題。因此,港幣現時面對的是信心問題。和當年98亞洲金融風暴不一樣,當時香港面對的是炒家狙擊。雖然也有一些香港人驚到連放喺櫃桶底啲股票都賣埋,港元隔夜息也抽到上300厘,你肯畀錢,人哋就肯畀息。但整體來說,當年的香港人並沒有對港元失去信心。

貨幣信心呢家嘢好麻煩,唔係你話有最優秀的金融團隊坐陣就得。如果只有你講,人哋唔信都無用。做leadership最怕就係以為自己係精英就得,以為所有人都係豬,淨係自己啱晒。尤其係管錢嘅leadership,being humble才是上策。枉你有超大數據支持論點,記住千祈唔好arrogant,金融市場最鍾意收拾招積嘅人。

我同每個在市場嘅香港人都一樣,每天都會收到很多資訊和閲讀許多研究報告。但係我最相信還是發生在我週邊的實際行動给我的啟示。就如Peter Lynch講要買一隻零售股,唔該親身行入去個mall睇睇先。就如賢內助嚿年warned我去買多一個凍肉freezer時,我都唔信,直至佢叫我去上海街睇下,原來週圍啲凍肉freezer巳經賣到擺晒出嚟!相同地,你自問過往這段時間你見週圍自己識嘅人有幾多去咗沽港幣買美元?你自己又有無同樣行動?如果你有,你會唔會相信淨係得自己一個頭腦清醒識得咁做,而週圍嘅人無?香港人畢嬲都係叻人,淨係睇吓我哋點樣靠自己一早去處理口罩就知。淨係睇數據?咁就會好似WHO咁喺全球死了差不多40萬人之後,先宣佈建議個個戴口罩。

到了今天的地步,香港人整個投資態度也是時候要改變了。你的收入,你的投資,你的住屋,你的投資物業,咁多年全部都係港元,唔通你以為港元就等於美金?Again,唔使講到咁複雜嘅資產配置(which我可以同你講三個鐘)只是好簡單的一點:當大部份香港人副身家係港幣層樓時,咁你其餘嘅資產係唔係重要揸住港幣呢?當你八至九成身家都係港幣時,你剩番嘅一至兩成資產都重係要堅持揸港幣?呢個根本唔係支唔支持港元的問題,而係香港人屬於這個多年的國際金融中心的一分子,應該要認識嘅最基本的貨幣配置概念。

如果好多香港人會夠膽揸住一隻由2008年金融風暴前,150蚊一路跌到依家35蚊,最近連股息都收唔到嘅港幣投資工具時,點解唔夠膽分散投資去一些派緊4至6厘息、在外國掛牌嘅美元ETFs組合?錢多啲的可能已經開了離岸銀行戶口,少啲錢也可以去出面的外國網上證券商開戶,投資可在網上進行。多有多做,少有少做,最怕唔做。分散風險,好悶好老土,唔係用嚟賺大錢,但可能可以保命。

遮打道口水佬

investMAN
For People of Style & Substance
掌握理財智慧 感受生活品味
http://investMAN.hk