【韓流】《金秘書》帶挈網漫熱 網民推李準基希澈扮女人
李準基希澈金秘書為何那樣綠豆傳
現時喺韓國熱播、由朴敘俊同埋朴敏英主演嘅tvN新劇《金秘書為何那樣》,《金秘書》係改編自同名人氣網漫,唔少劇迷都讚劇組搵朴敏英同朴敍俊做男女主角係跟足原著。
唔知係唔係見到近日《金秘書》咁受歡迎,所以即時令到其他劇組對網漫虎視眈眈,當中另一部人氣人氣網漫《綠豆傳》亦確定會翻拍成電視劇,故事就圍繞為咗逃避同小新娘結婚嘅男主角,為咗避開結婚,男主角就男扮女裝匿埋喺寡婦村生活,同時喺裡面就遇到唔想成為妓生嘅女主角,兩人展開浪漫愛情故事。
《綠豆傳》於2014年開始起網上連載,網漫作者日前就喺社交網公開咗自己已簽咗故仔版權畀電視台,不過暫時未知邊間電視台播,同時選角及播放日期亦未確定。唔少網民得知《綠豆傳》會翻拍嘅消息後,都紛紛留言推薦心水男主角,由於男主角要男扮女裝,所以做男主角就要擁有美麗得如女人嘅樣貌,唔少網民都力推曾喺電影《王的男人》中扮過女人嘅李準基做主角,事關李準基嘅女人造型一向受到各方讚美,覺得佢那種陰柔美比女人更女人。
至於男團Super Junior嘅金希澈同樣受到網民推舉,希澈平日都愛以女裝打扮示人,佢亦唔介意喺網上分享佢嘅女裝造型,加上佢嘅女裝亦都受到讚美,但希澈好少拍劇,所以佢肯答應拍劇嘅機會就似乎唔多大。
更多韓流,喺晒《娛果》
http://fb.com/appledailyent