韓國男團JYJ嘅成員朴有天將於今年8月退伍，早前佢驚爆將於9月娶南陽乳業集團外孫女黃荷娜，即退伍後即要為婚禮做準備。

而朴有天同黃荷娜打得火熱，平日未婚妻就最愛喺Instagram更新狀況，但從未公開有關朴有天嘅照片，不過今日凌晨黃荷娜就忽然上載咗朴有天嘅做義工嘅相片，當中可見朴有天戴住口罩同手套，拎住個鐵鏟，落手落腳做勞動。黃荷娜亦留言話：「同哥哥第一次奉獻活動，非常非常感謝。」

另外，今個月4號黃荷娜就上載過一段片段，當時唔少人就猜測佢疑似上載送畀男友嘅生日禮物，由於4號係朴有天嘅31歲生日，當日黃荷娜就顯示咗一張匯款嘅圖案，當中佢仲匯出合共7,777,777韓圜(約53,666港元)，黃荷娜仲留言話：「原本想一次過畀7,777,777，但因為唔可以一次過匯咁多錢，只好1,111,111、2,222,222、3,333,333咁匯。」網民都估計黃荷娜送錢畀男友做生日禮物。今日黃荷娜就上載朋友傳給佢嘅短訊截圖，原來朋友問佢有關嘅傳聞係唔係真，黃荷娜就話自己唔再保持沉默，亦希望大家停止再傳播呢啲虛假嘅事實，又強調佢親哥哥於6月2號生日，指哥哥因為佢經歷咗好多事情，而佢哋父母因為為要照顧佢呢個麻煩嘅女兒，所以冇足夠時間照顧哥哥，所以佢想趁哥哥生日表達心意，又請大家唔好再有咁多仇恨。