自從拜恩宣佈咗季尾退役後,大家睇佢今季每一場比賽,都好似最後之戰咁珍惜眼前人。當然,大家都會搶購Kobe號波衫,不論以前嘅8號,抑或依家嘅24號,但呢兩個冧把,就令到湖人方面,喺季尾幫佢辦退役儀式時幾頭痕。以往,著名嘅NBA巨星退役,將件波衫高高掛起,都係一個人一件,但Kobe職業生涯兩個號碼,同樣有著光榮戰役,前身8號由出道1996年到2006年,10年期間攞過三次總冠軍,仲有對速龍81分之役,都係著呢件單冧把。
之後嘅日子,Kobe著24號波衫,亦攞過兩次總冠軍指環,仲有MVP殊榮,所以兩個冧把,都可以代表拜恩嘅成功日子。網民亦熱烈討論究竟退役8號定24號先啱,唔少都認為退晒兩件最好,因為同樣有代表性,而美國籃球網站亦紛紛有投票,用民意嚟選擇8定24,夠晒民主!
體蘋果facebook專頁↓↓↓
http://fb.com/appledailysports