新城知訊台主辦《2017人氣新人大熱唱》，今日喺紅磡置富都會舉行，為將於12月29日假香港會議展覽中心舉行嘅《新城勁爆頒獎禮2017》拉票，出席歌手包括顏卓靈、王嘉儀、黃意雅、伍富橋、組合未能接通、秦馨敏、劉敬雯、MFM、林若盈、韓梓亮、Serrini、鄧月平及徐加晴，而鄭融、鄭欣宜、林奕匡及葉巧琳到場支持一眾新人，同新人分享頒經驗。

欣宜之前意外跌斷腳，動過手術並休息一段時間後，噚日終於拆石膏，今日撐住拐杖出現，欣宜話：「終於拆石膏，可以沖涼，見到自己隻腳仲幼過最瘦時，醫生叫我一星期做兩次物理治療，我貪心啲做三次，o依家仲有啲瘀，有四、五吋嘅疤痕，有諗過用紋身遮咗。」欣宜笑言，肌肉萎縮嘅腳成為修長美腿，佢話：「自己見到都好驚，又瘦又多毛，仲影咗好多相。」日前社交平台上見到欣宜同許廷鏗等人打機，地上一遍煙頭，欣宜又不時爆粗，欣宜話：「我o依家都少接觸煙酒咖啡，我覺得英文粗口唔涉及他人較接受。」

今年嘅新人顏卓靈有豐富幕前演出經驗，但自言企上舞台唱歌顯得特別緊張，顏卓靈話：「嚟之前keep住聽自己嘅歌，緊張過拍戲，因為拍完齣戲上咗唔會再補拍，唱歌每次要重新面對，都幾得意，去頒獎禮會以參加party心態去睇，可以聽到好多前輩唱歌。」顏卓靈話喺新人當中與劉敬雯較熟絡，其他歌手要多啲認識。

誓要擺脫「巨胸翠如」稱號嘅鄧月平，今日露肩裝出現，已算是最性感嘅歌手，鄧月平話：「唱歌太性感會凍親，出席頒獎禮會自己做衫，如果趕得切就會着自己整嘅大露背晚裝，着自己整嘅衫攞獎都開心啲。」鄧月平話自己做衫技巧純熟，如快手嘅話，兩日就可以做起1件衫，鄧月平話：「最近成日落深水埗買布，買咗10種布，又買咗人型model，用嚟拮大頭針，整衫可以方便啲。」

更多娛聞，喺晒《娛果》
http://fb.com/appledailyent