馬年都未到，馬雲同馬化騰已急不及待快馬加鞭兼馬到功成，線上線下鬥個你死我活，你入股南華城（1668）時我食中信21（241）隻殼，你踢高隻華南城八十幾個%，我爆隻中信21爆夠5倍，兩位馬氏宗親球來球往夠晒交流，突然間將科網大時代升溫，呢期真係堪稱地上最強馬氏宗親。

Miss咗1668同241？唔使愁，根據戲軌，呢兩匹fit馬啱啱至真正入閘，大家仲有好多尋寶嘅機會，先唔講兩位馬生仲會點邊隻成金（話估到都呃大家喇），勝曉嵐隨便數吓都有幾隻疑似受惠股未曾爆發，候選佳麗最少有4個，分別係聯夢活力世界（8100）、寰亞傳媒（8075）、中國創新支付（8083）同埋中國擎天軟件（1297），1297係馬雲嗰邊1.7億入咗股嘅，其餘3隻就同馬化騰有關，最堅實嘅係8075，雲峰基金掟成5億入去，其餘兩隻就揸住啲CB未兌，而呢兩隻之中，8100比較丟架，竟然喺呢個火紅嘅時候唔爆升兼喪跌，無喇喇俾有心人咁質法，難道大茶飯iscoming？

Bytheway，華南城vs中信21世紀呢鋪，馬雲係贏咗馬化騰嘅，唔係淨話241個股價，大家睇佢趁證監大龍鳳論壇之前嗰晚（上星期四）公布，第朝個個都要講阿里，就知又俾佢靚抽到喇!