草蜢三子聯同「歲月友情組合」包括鄭伊健、謝天華、錢嘉樂同林曉峰,今日去到屯門舉行「《歲月友情xBETHREE》簽唱會」,七子喺現場獻唱之餘,又同粉絲玩遊戲。
草蜢今年踏入組合成立三十週年,三子要忙巡迴演唱,決定今年唔會搞紀念演唱會,蔡一智話:「今年整年都冇時間,今時今日要搞一個大家叫好嘅演唱會,唔可以咁草率,今年唔會搞住,可能出年或遲少少,可以預備得好啲。」
蔡一智話好感恩,一個組合要走三十年並唔容易,佢話:「我哋唔會唱咗上神枱,反而係好謙卑咁唱,今年三十週年,我會打兩個大牌送比兩位拍檔,但係有咁薄得咁薄。」
蔡一傑就話希望出年可以做到週年演唱會,今年會花時間做巡迴,畀外地fans見吓,佢話:「我哋望住譚詠麟去做,佢邁向四十週年,我哋都希望有四十年。」蘇志威就話睇住佢哋隻演唱會DVD止住咳先。