噚日有兩隻做銅相關加工產品嘅股仔急升，分別係長盈（689）升咗27%，以及隻榮盛（1166）升咗24%，兩隻股仔早排分別拍住內地國企，前者同江銅（358）合作冶煉，後者則透過旗下華藝（559）同紫金（2899）合作搞廢銅回收，雖然好消息一早公布咗，但係就等噚日先至嚟料。
長盈近排宣布搞埋金屬物流，而榮盛則公布組合營並拍住外資大車廠。榮盛日前宣布，與北京福斯簽訂諒解備忘錄，擬組合資公司從事汽車聯接線產品生產及銷售業務，估計投資額5000萬至1億元人民幣。據報北京福斯現時供應汽車電線予通用汽車及豐田等大型汽車生產商。
睇睇報價機，榮盛PE低至4倍，原來由於去年集團主營業務毛利大幅上升41%，加上遠期期銅合約對沖錄得7915萬元利潤，令全年業績扭虧為盈，業績好公司同時宣派高息，末期息每股4仙，股息率有5%，高過好多大價工業股。
榮盛去年中收購惠而浦旗下生產白色家電及汽車所需產品的Brascabos，年底擬收購另一家歐洲電線及電纜生產商則已完成盡職審查，來年新收購提供盈利貢獻，業績繼續增長，屆時PE更低。呢隻工業股中嘅滄海遺珠，絕對有留意價值。

錦藝獲基金增持

其他冷門工業股仔之中，噚日有隻錦藝紡織（565）升咗16%，呢隻股仔PE都係低至5倍，股息率有3.7厘，同樣係超值工業股。港交所日前股權變動顯示，AllianzSE於上周二以每股0.465元增持錦藝約1.33球貨，令持股量增至7.11%，邊個話冷門股仔無基金吼？據公司管理層表示，集團來年將繼續調整產品組合，重點投入資源發展毛利較高嘅運動服布料，而由於產品以內銷為主，故人民幣升值對集團影響輕微。