一向認為騎馬人工作非常重要，尤其教馬轉腳，要每日在細圈每個彎位落心機調教，並不是話揾雷神、潘頓閒時跳一課便可以做得好，一個馬房如能擁有一班優質策騎員，對馬匹前景、競賽里程，有着長遠好處。

講到用人為才，相信每個練馬師都深明這個道理，苗禮德出名向來嚴謹，尤其對廐內策騎員要求極高，就以「瑩之光」為例，上季三歲，新馬稚嫩，縱使上季尾連贏兩場，最後一役初跑轉彎泥地千二，最後直路仍是單邊出死右腳捱到尾，當然可以話馬匹質素超班，亦可以話仍有大把進步空間。

上季五月跑完提早唞暑，今季轉交另一位年輕力壯手瓜起𦟌騎馬人接手，見每日細圈就是集中調教轉腳問題，八月中大閘，只得四匹馬，參考價值不高，但已見到入直路識轉正左腳，做啱每一個步驟，之後每課快跳都做到出腳流暢自如，明顯大幅進步，如今踏入四歲黃金之年，升浪沒完沒了。

蘇偉賢是今季認為重點吼實馬房之一，不論從化兵或身處沙田馬匹操練部署，都擺明決心季初階段搶攻，手法大多安排十至十四日前試閘，埋門再兩段。

但「醒目再臨」情況較為特別，沒有上述所講操練程序，反而上仗賽前只安排跳七課單跳，沒有試大閘下，在開鑼日（2日）安排跑嫌短千二米，部署上顯然但求熱身，結果後上只輸受惠慢步速的「勁無比」跑第二，就更確認馬匹今季進步兼評分有利。

相距上賽七日，周四（6日）朝仍再安排快跳，而且沒有加眼罩下，走勢爽勁，精神奕奕，明日（9日）跑回正宗贏馬路程千六米，既然有上周出賽證明，贏馬條件呼之欲出。