北京監粗「釋法」,扼殺港人民主,經已引起國際公憤,英國外次韋明浩召見中國駐英大使,指出中方咁搞法與中英聯合聲明不符。英國前首相馬卓安喺香港開會,亦表示好遺憾同埋好疑惑,美國總領事表態,負面抨擊,當然亦不在話下。
唐唐忽然搶功 目無尊長
第三屆特首熱門唐唐,喺上海話,釋法係中國「內部事務」,不應受外國影響。唔出聲冇人話佢唐唐啞,呢啲咁沉悶嘅外交詞令,論級數,亦唔到唐唐開聲,因為基本法講明,外交同國防事務由中國政府管,唐唐瞓身搶功,當咗自己係外交部發言人,亦可謂目無尊長。
中方自知理虧,因為唔係淨係有部基本法,中方近幾年刻意唔提中英聯合聲明,想側側膊,令到港人唔記得咗有呢份遠較基本法更為重要嘅國際協議。親中喉舌大罵英美「干預內政」,話中英聯合聲明第一段就話英國同意一九九七年七一將主權交還中國,咁就即是話英美國際再無權干預香港。簡直係廢話。中英聯合聲明唔係得一句一條,而係將交還香港主權嘅條件講得清清楚楚,香港人享有高度自治,中國政府只負責管理香港嘅國防及外交。中方聲稱對基本法有解釋權,但國際法嘅專家話,任何解釋權都要受制於國際協議之中嘅呢一條,實情到底係點,睇嚟都要國際方面跟一跟進咯。
喬曉陽亦知道大鑊,臨走又施展軟功,話了解到香港人有民主訴求,又話要求普選嘅好多香港人都冇私心。呢句說話,總算有一兩分人性。李柱銘係大律師,佢本來可以唔搞民主,專心打官司搵大錢,點解要為咗一項理想,奔波咗二十年,遭到土共長期誹謗、辱罵、潑屎,連先父嘅英靈,都受到中國政府高官安民嘅粗暴褻瀆。李柱銘係為咗乜?唔通儍咗?