端午佳節，食糭、睇龍舟競渡最應景，民主黨連續幾年組隊參加大埔區龍舟比賽，屢敗屢戰好有體育精神，今年最特別係由主席何俊仁帶隊兼親自坐艇做鼓手。由於仁哥體形甚具份量，有關方面好擔心「民主龍」負磅太重，所以精挑細選扒龍舟隊員。八方聽聞，曾經落選嘅人，好似張賢登、陳家偉等冇份上艇，甘乃威、黃成智呢啲邊緣分子都免役，唔知係咪驚佢哋搭沉船。
「民主龍」隊員、大埔區議員任啓邦話佢哋近日操練咗五次共10個鐘，由於仁哥公務繁忙，所以冇參加過練習，不過佢話做鼓手唔難，相信仁哥今日試幾次就可以上手。有民主黨人同八方講笑咁講，該黨成員素來唔聽主席支笛，馬丁做創黨主席時已有呢個優良傳統，所以就算仁哥頻頻操練都冇用，因為一定冇人聽佢點。

唔想有人搭沉船

龍舟要扒得快又穩，據講其中一個秘訣係落槳要齊，否則慢行兼隨時反艇，為咗彌補仁哥負重磅同冇人聽佢打鼓呢兩個弱點，扒「民主龍」隊員要盡量輕磅，不過船尾就要搵有份量嘅人坐，平衡番龍頭仁哥體重。八方收到風，「民主龍」成員主要係黨內少壯派，所謂四十世代骨幹人物好似冇份上船。
對此安排，官方講法係少壯派夠氣夠力，圍內流傳笑話，實情可能係唔想有人搭沉船。大家都知，黨內幾個四十世代人物，舊年區選時滑鐵盧元氣大傷，今年搵唔搵佢哋合組名單都要考慮吓，搵埋佢哋上艇，萬一搭沉船真係唔知賴邊個好。
仁哥喺大埔領軍，前主席李永達（高達）另起爐灶，拆隊「達人家族」今日喺西貢出賽，據講隊員包括佢多名拉票樁腳。高達同八方講，佢哋只係練咗三次，但由於隊員冇乜搭沉船分子，又唔使負重磅，所以都有啲信心。仁哥坐龍頭做鼓手，高達則坐龍尾負責掌舵。扒龍舟舵手好重要，如果舵手經驗不足，隻艇會氹氹轉，民主黨由高達掌舵時冇乜發圍，八方希望佢今日「舞」得掂隻龍舟，唔好反艇而回。
mailto:[email protected]