利華古遜話晒都係近20年來德甲「第二勢力」表表者，舊年亦係聯賽季軍，勢估唔到今屆落得如斯田地，尤其是季中辭退教練羅渣舒密特改聘前漢諾威教練哥古特後更係不升反跌，周五德甲主場出擊依然冇起色，其中死球防守更係不堪一擊，開波17分鐘唔夠就俾史浩克04嘅古多貝斯托拿、賀維迪斯同舒賀夫攻破大門落後0:3，最終只係靠傑斯寧破蛋輸1:4，賽後31戰36分繼續排第12位，但多打一場下只係距離護級線4分，話佢哋有降班危機絕對唔係講笑！

計埋呢場，利華近10場聯賽得1勝3和6負，傑斯寧都坦言無解：「球迷們問我哋發生咩事導致踢成咁，但我無法回答，呢個實在係好艱難嘅處境。」難得球迷們依然不離不棄，球員亦有走去看台同佢哋握手互相鼓勵，贏就一齊贏，輸就一齊輸！