亞視前主要投資者王征舊年2月入稟申請將亞視清盤，之後司榮彬旗下公司Star Platinum Enterprises Limited以「白武士」姿態由王征手上購入亞視股權和債務，並與所有債權人達成共識，將分期支付亞視所欠債務。司榮彬一方早前已向法庭提交債務重組方案，法庭今日開庭處理。代表Star Platinum嘅律師今日指出，Star Platinum有能力支付相關債務，法官透露沒債權人就重組方案提出異議，於是批准方案，並撤銷清盤呈請。

曾經喺無綫擔任高層嘅吳雨，現獲委任做亞視行政總裁，《蘋果》今日聯絡吳雨，問到法庭批准重組方案，撤銷清盤呈請之後亞視下一步做乜嘢，吳雨話:「下一步我哋18號個Apps會正式啟動，同埋我哋會announce我哋個亞視正式成立。」

有關節目內容，吳雨話今個月18號會喺麗思卡爾頓酒店舉行「亞洲電視數碼媒體有限公司重組啟航暨應用程式啟用儀式」公佈所有節目內容、藝人陣容同埋個營運模式，吳雨話:「首我哋有Apps啟動，然後一月底正式OTT個台面世，大家可以通過機頂盒睇到我哋節目。」講到亞視會行乜嘢節目為主？吳雨話:「全部娛樂節目，除咗新聞。」之前有傳聞搵咗朱慧珊、陶傑、陳志雲、葉雅媛等人做節目，吳雨話:「18號大家會知㗎啦。」

據《蘋果》收到嘅可靠消息，新亞視搵咗陳志雲擔任全新一輯《百萬富翁》主持，取代當年陳啟泰，而陶傑同曾華倩亦會為新亞視主持節目。而亞視今次再做《百萬富翁》都會一如過往派錢，每次最高可以攞到100萬港幣。

亞視翻生有兩個大攻勢，除咗搵志雲倒戈主持《百萬富翁》之外，仲以超過2000萬港幣買咗范冰冰主演、投資幾億人民幣嘅大陸重頭古裝劇《贏天下》(暫名)香港播映權，到時亞視會同大陸同步播出，據知無綫原來都有爭呢部劇嘅香港播映權，但最後因為價錢方面落空。

更多娛聞，喺晒《娛果》
http://fb.com/appledailyent