政府今（19日）召開記者會，宣佈收緊部份防疫措施，包括餐飲業每晚6時後的「禁堂食令」將延長多7天、即至本月28日止。

香港中小企食店聯盟召集人林瑞華指，業界估計此禁令將實施一個月，雖然認為對防疫有一定程度幫助，但對港府完全沒有提及第三輪防疫抗疫基金細節感到失望，「你叫我哋點做落去呀？而家直頭係無希望」。

亦有茶餐廳大呻，「禁堂食令」生效後，每天生意額下跌四成，小店前途未卜，只好見步行步。

相關新聞：
4日暴增300個案 林鄭推「室內蒙面法」補鑊 公務員在家工作一周（附新措施列表）

餐飲業晚上6時後的「禁堂食令」，由上周三（15日）生效，原定為期7天，至7月22日止。特首林鄭月娥今宣佈，禁令將會延長多7天，即至7月28日止。

616牛肉火鍋專門店負責人、香港中小企食店聯盟召集人林瑞華指，業界早已預計到禁令將會延長，更估計將會實施至少一個月。他指，禁令對防疫「點都有少少幫助」，但認為新一波疫症爆發或來自豁免檢疫人士，「咁一係你就做盡啲（封關），但你又唔做得盡。」

林指，現時業界感到「好難捱」：「外賣我哋已經要做折，二來唔係個個適合做外賣，如果你做韓燒都死得啦！」他坦言，對於林鄭或食物及衞生局局長陳肇始絕口不提第三輪防疫抗疫基金大感失望，「連少少口風都唔講，『準備緊』、『盡快公佈』呢啲說話都無，你叫我哋點捱呢？完全無希望呀覺得而家係！」

小店青花亭負責人Susan（化名）指，現時「禁堂食令」與「限桌令」雙管齊下，令小店生意大跌，其店舖只剩下以往四分一生意額，「試過全日只得$2,000至$3,000，夜晚得兩三張單。」

Susan指，現時不同地區均有確診個案，認為感染源頭來自公共交通工具，「迫巴士、迫地鐵返工返學嗰陣先係最犀利，咁你停食肆，點解唔停埋返工？」

她批評，政府是以食肆「做樣」，為向公眾證明已推出防疫措施，「咁點解開頭會畀幾萬個、十幾萬個人免檢疫過嚟香港？而家一鑊泡之後，就唔畀人出嚟食飯喇，其實即係『噍硬』我哋」。

她指，現時需動用自己積蓄支持店舖營運，苦笑指「睇下捱得幾耐囉」。

基隆茶餐廳老闆娘Cat同樣認為，小店淪為今次抗疫「犧牲者」，「而家的士都有群組，的士四方八面接人，中咗招嘅的士點樣處理？」她批評，政府未有弄清疫情感染源頭，就以食肆來「做戲」：「如果幫到手，停14日我都肯，但問題係你做啲唔做啲，咁對我哋啲小店好唔公平！」

Cat指，現時同行生意大跌，但企業如需申請抗疫基金不可裁員，「你（申請抗疫基金）又唔cut得人喇，咁點呀？」令業界相當難做。

其茶餐廳在「禁堂食令」下生意大跌四成，「我哋以前做開小菜，而家惟有轉啲簡單啲嘅菜式」，務求節省成本。被問到店舖前途，她無奈指「唔知㗎……見步行步囉」。

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新