航空公司清潔流程馬虎早已不是都市傳說，早前有國泰空姐大爆不少飛機航程與航程之間僅得半小時清潔，但原來一山還有一山高﹗記者向香港某航空公司的空姐JoJo打聽，她爆料：「每班機完咗都有清潔姐姐上嚟清潔，視乎架機趕唔趕住走，通常5至10分鐘內就會清潔完。」而清潔流程主要是執走垃圾和吸塵。

公家廁所大多不太乾淨，但在機上人有三急，也被迫要去。廁所向來是細菌溫床，幸好近日疫情肆虐，航空公司也較以往注重衞生。JoJo指空姐每15至20分鐘就會檢查廁所一次：「我哋定時定候執一執個廁所，不過都唔會好仔細清潔，疫情前就只會抹一抹水迹，而家就會噴下消毒酒精。」

點擊瀏覽更多空姐解構：
「乞兒飛」真相 一折機票好睇唔好食
受夠飛機餐 特別餐應該點揀？

機上污糟之最

被問到飛機上最污糟是甚麼地方，答案竟然是座椅和地面，JoJo坦言：「一定係張凳同地下，因為冇咩明顯污迹，張seat cover係唔會換，同樣道理，地下都唔會點消毒。」事實上，加拿大廣播公司（The Canadian Broadcasting Corporation）就曾在機上收集細菌進行測試，結果亦在座椅頭枕上發現葡萄球菌及大腸桿菌，所以乘客坐最好自行清潔座椅。椅背後袋就更加惡心，用過的紙巾、臭襪、食物殘渣甚至香口膠周圍塞，通常清潔只會執走裏面的垃圾，入面有多少細菌？簡直不敢想像。

機上乘客千奇百怪，有些衞生意識甚低造成駭人情況，JoJo就大爆其中一個最難忘的經歷：「最核突係啲客嘔落廁所洗手台，塞住晒去唔到，如果一有勁嘅turbulence（氣流）就飛到周圍都係。」

毛氈可免則免

機上溫度較低，不少乘客都會用毛氈保暖，但原來毛氈也暗藏殺機。「毛氈勁污糟，如果有人嘔嘢落地下，我哋通常會用氈冚住先。另外，有好多人會除鞋除襪冚氈，又有小朋友試過瀨尿後，大人用毛氈來抹。」雖然每班航機都會清洗毛氈，但JoJo就表示不擔保洗得乾淨。

當機上幾乎每個地方都無一倖免，乘客又可以如何自保？JoJo分享自己平日乘飛機的小貼士。
1. 坐飛機時穿着長衫長褲。
2. 坐下前用酒精噴一噴張座椅和附近的扶手、窗、遙控、摺枱等。
3. 盡量不要周圍摸，特別是椅背小袋的雜誌。

記者：丁詩詩
編輯：吳允、鄒仲安

-----------------------------
識抗疫・有獎賞
答啱問題送大禮： http://bit.ly/3cGFhMr
-----------------------------
〈果籽〉TG Channel 上線喇
立即追蹤接收最新資訊
-----------------------------
全民自救・和你抗疫
《家居抗疫手冊》四語精華版
-----------------------------
點擊瀏覽 健康蘋台網站 獲享更多健康資訊
-----------------------------
立即去動物蘋台 ，飽覽主子大小事！
-----------------------------
【武漢肺炎】專頁
全民自救 抗疫資訊盡在《蘋果》