捲入漏報利益醜聞嘅狼振英噚日去咗西貢，探訪專門幫青少年戒毒嘅基督教得生團契，呢間機構開咗茶座同園藝廊，等班學員戒毒後可以喺度打工。專程到訪嘅狼振英仲用咗80幾蚊幫襯，買咗兩盆士多啤梨同一盆意大利香草，用盡方法冧盡所有人。之但係，被視為挺唐報章嘅記者，就肯定感受唔到狼振英嘅愛嘞。八方聽到至少兩份挺唐報章記者大呻，狼振英突然開記者會時，佢哋唔止一次被當透明。最新一例係上周三狼振英漏夜開記者會反擊政府爆陰毒嘅事，有挺唐報章記者話，如果唔係行家通知，佢哋都蒙在鼓裏。狼振英口口聲聲話要「開誠佈公」，點知到頭來咪一樣親疏有別，講一套做一套，真係抵鬧！