62歲任達華同51歲劉嘉玲最近合作葉念琛賀歲片《我的情敵女婿》，成部戲大堆頭，係咁加入唔同嘅星，營造熱熱鬧鬧氣氛，連近日推出處女寫真嘅樂瞳都受到邀請，佢喺戲中扮演一位耍大牌明星。

樂瞳戲份唔多，基本上佢同華哥、嘉玲係冇對手戲，但拍攝當日，咁啱樂瞳早到現場準備，而咁啱就見到華仔同嘉玲未收工，樂瞳爭取機會做小粉絲集郵，樂瞳今日回覆《蘋果》時話：「兩位前輩真係好正，佢哋好有氣場，我忍唔住係咁目不轉睛望住佢哋，華哥唔似真實年齡，佢魅力沒法擋，嘉玲姐都好有攝人味道，我睇住佢哋拍戲，演技好自然，好吸引，或者因為佢哋夠人生閱歷。」

樂瞳好恨有機會向呢啲前輩學演技，所以佢話想送本寫真賄賂導演葉念琛，希望可以加場戲同華哥或嘉玲一齊拍，樂瞳笑言：「可以減一組錢，我都好願意。」