蔡約翰現時已92Win在手，打破了練馬師單季頭馬最多紀錄，睇勢頭完全未有放慢手腳。如無估錯，蔡約翰想創造本港賽馬史紀錄，一季贏出過百場頭馬。

以香港如此緊湊的賽馬競爭，要做得到實在好難，但看蔡約翰今季情況，能夠寫下歷史新一頁，機會好大。

後晚（28日）出六駒，但全部有實力，特別係「八心之友」與「騂龍」，前駒上場轉跑谷草1200米大勝接近四個身位，換來十分加幅，雖初跑三班但有信心必冇問題，能影響此匹細粒馬只是磅位。

季初贏泥地負123磅，加分後負重磅即無計可施，直到上仗回落負126磅即再交出表現，今戰升班進一步孭輕至118磅，對此匹細粒馬只有好處，可期繼續一放到底。

「騂龍」輸幾場又重返四班，近四仗大敗賽績可抹走，始終季內兩Win都在四班取得，典型四班頂三班實力。

至於第七場蔡廐出「龍船」、「鈦金剛」一對，表面睇似前駒秤高一線，但不要忘記後駒上賽大敗只因變化地，賽前曾試1700米谷閘一放到底，不排除今仗才是目標所在。