周五舉行嘅全運會男籃決賽，遼寧主將周琦開波冇耐就受傷，右手流晒血被迫離場接受治療，而球隊第一節亦落後新疆18:21。不過，遼寧喺重新登場嘅周琦帶領下，第二節打出一波9:0攻勢，完半場時已經反超至39:38。

易邊後，周琦同韓德君呢對「雙塔」越打越好，加上控衞郭艾倫亦多番跳投得手，遼寧終以78:61擊敗新疆，隊史首奪全運會冠軍。負傷上陣嘅周琦今場交出「雙雙」11分12籃板，隊友郭艾倫亦得22分9籃板，係球隊贏波嘅頭號功臣。

值得一提嘅係，遼寧早前四次打入全運會決賽，但係都屈居亞軍。佢哋喺1987、1993同1997年三度不敵解放軍，而2013年又輸畀廣東，直到今年先可以贏得冠軍。主教練郭士強賽後指球隊終於搣甩千年老二嘅稱號，仲話：「我唔優秀，但我嘅隊員非常優秀！」

至於同日舉行嘅男籃季軍戰，廣東憑易建聯交出「雙雙」17分20籃板，加上周鵬射入全場最高嘅18分，助球隊以65:49擊敗上海，成功摘銅。