由金秀賢、孔孝真、車太鉉同IU主演嘅KBS劇集《製作人們》今晚播出第六集，承接上一集講到白承燦（金秀賢飾）質疑羅俊模（車太鉉飾）早已知卓藝珍（孔孝真飾）鍾意自己，不過羅俊模就似乎想扮唔知，同卓藝珍維持好友嘅關係。二人回歸返當晚飲醉件事，當時醉咗嘅白承燦就講咗句：「我唔鐘意卓藝珍鍾意羅俊模呢件事。」似係半表白自己對卓藝珍有好感。

當白承燦指摘羅俊模扮唔知卓藝珍心意係好殘忍嘅行為時，羅俊模反而問白承燦點解咁關心呢件事，白承燦就呆咗唔識答，再一次為白承燦同卓藝珍之間嘅關係埋下伏筆。

到晚上，白承燦約卓藝珍於公園見面，白承燦講大話話羅俊模唔記得卓藝珍曾經借醉表白件事，令卓藝珍放下心頭大石，而卓藝珍更開始同白承燦閒話家常，卓藝珍就回憶喺少年時，卓藝珍屋企因經濟問題而要賣屋，當時正正就係羅俊模嘅家人買下卓藝珍家人嘅住所，解釋咗點解卓藝珍咁想喺羅俊模屋企住。而白承燦因為卓藝珍向自己傾心事而覺得好開心，二人關係更進一步。