已婚嘅大台新聞主播吳璟儁被傳同新聞小花藍可盈過從甚密，有周刊喺上周六影到吳璟儁現身藍可盈居住嘅天水圍，仲話佢哋嘅友誼維持咗4年，喺新聞部早已通晒天。

由於兩位當事人暫時未有回應，咁究竟新聞部嘅人知道佢哋乜嘢秘密呢？曾經喺大台新聞部做過嘅方健儀，今日喺尖沙嘴出席慈善活動，自然成為記者追問對象。

因為感冒咗一個禮拜，方健儀雖然聲沙沙，但好醒目話：「實知你哋會問，同事私生活唔講，亦唔評論。」問知唔知佢哋嘅感情生活？方健儀依然好口密話：「大家同事，之前做晚間新聞，但冇問私生活。」

問信唔信吳璟儁搞婚外情？方健儀繼續封口話：「唔評論。」有指外間覺得主播私生活頗混亂，方健儀話：「自己只關注工作暢順，私生活冇理。」可是因為日夕相對易生感情？佢話：「唔會，睇心態，自己同老公感情好又係同事。」係咪好易日久生情？佢話：「各行各業都有，伍家謙都話見我多過阿媽。」問係咪關乎定力問題？佢就話唔評論。