份通告話，業績見紅係因為全球金融及物業市況逆轉，令「集團投資物業，以及證券組合公平價值有所變更而錄得虧損，及滙率波動所致。」
最尾呢句，好易令人產生聯想，所以通告特別補充一句：「避免誤解，本集團並無及將不會涉及任何累積或累沽工具。」即係先旨聲明，我哋冇玩Accumulator（累計認購期權）或者Decumulator（累計認沽期權）。
唔玩都損手，喺金融海嘯下都好難避免囉。白花油賺變蝕，自然急住要現金，佢哋10月時本嚟想賣咗銅鑼灣哥頓大廈天台物業，雖則賣天台套現嘅金額，對集團嚟講好濕碎，但喺呢個時勢，慳得一蚊得一蚊啦。可惜，最終賣唔成。