李八方online︱田二少踩車實測屯馬綫：中止又中止 勁過立法會！
蘋果日報 2020/10/11 12:57
田北辰李八方online屯馬綫
田北辰喺Facebook到形容，元朗踩單車入上水要「中止又中止」，係「勁過立法會」。
港鐵屯馬綫一期早前通車，實政圓桌立法會議員田北辰早已試搭。田二少噚日就轉為實測原本全程約60公里嘅屯馬綫「單車版」，佢就由元朗踩入上水，路程約11公里。平時放假都會帶啲孫踩單車嘅田二少話喎，聽聞呢條新單車徑一波三折，七上八落兼且九曲十三彎，所以「身先士卒」探吓路。
田二少朝早11點由元朗單車匯合中心出發，踩到上水雙魚河休憩處，約下晝1點完成，踩完最大感受係新單車徑「中止待續」嘅威力。咁，踩車都似立法會開會咁「中止待續」？係呀，佢話為咗安全同跟足規矩，粗略計都要中止至少40次，真係勁過立法會喎。
佢同時提到一啲個別問題，例如部份路段指引唔清晰、燈位太耐、甚至有「消失的單車徑」等。總括嚟講，佢就唔會帶啲孫踩足呢11公里啦，最多都係踩吓雙魚河嗰段啦。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！