當年今日
關於我們

【李八方online】林鄭聖誕都放假 同煲呔一樣升呢「政治家」

蘋果日報 2018/12/20 14:04

聖誕林鄭月娥林兆波UGL李八方ONLINE鄭若驊

聖誕就快到,唔少人plan定放假去旅行,好打得嘅特首林鄭,聖誕亦會唞幾日,12月22號到28號離港休假,不過外界更加期待嘅係,已經放緊聖誕假嘅律政司司長鄭若驊,復工後幾時再就UGL案解畫?
放假前夕,林鄭繼續出席活動,佢今日喺恒隆數學獎頒獎禮時致辭時,對「數學家」侃侃而談,皆因佢另一半林兆波都係「數學家」吖嘛。林鄭話喎,曾經有人講過,數學家係嘗試用最少嘅言語去講一件事,而政治家就相反,八方聽完都覺得講得幾啱,尤其唔少政客講完長篇大論,仲好似冇講過嘢咁添!
林鄭繼而話,大家可能會好奇,數學家同政治家嘅婚姻,會發生咩化學作用?聽到呢度,唔少在場人士都諗到,林鄭似乎講緊自己囉,佢口中嘅政治家唔係自己仲係邊位?佢之後笑笑口話好尊重自己嗰位數學家老公,喺老公面前佢亦唔敢講太多嘢!
其實去年參選特首時,林鄭喺報名表「職業」嗰欄懸空冇填報,時隔一年,原來林鄭已自覺同前上司兼前特首曾蔭權一樣,已經「升呢」做「政治家」。八方唔知林鄭點解喺老公面前唔敢講嘢啦,但好肯定係唔少人都想林鄭講多啲嘢,更重要係想佢叫下屬鄭若驊,唔該都就UGL案講多啲嘢。而林鄭活動完結後,冇回應傳媒提問就走人。
empty
林鄭(中)話好尊重自己嗰位數學家老公。何頴賢攝
empty
林鄭今日出席恒隆數學獎頒獎禮時致辭。何頴賢攝